Sending postcard

刊登于 2015-04-20By dingdingAll, 周围旅行

Sending postcard

cc photo via flickr user Nuwandalice

而家去旅行个个都喺闸口影相/影机票/影架飞机/影passport夹机票,去到当地都係用相机电话不停影,影美食/靓景/酒店房/沙滩,放上facebook留念。唔係话咁样做有问题,甚至我自己都係会facebook开个album放相入去纪录一个旅程。虽然係咁,我呢啲科技白痴都係比较中意一啲比较实在、tangible嘅嘢俾我留个纪念,明信片-postcard呢个时候就帮到我。

明信片听落好似好old school或者伍,唔似而家有人会寄。旅行嘅时候我未必会行街买嘢或者买纪念品,但係一定会寄一张明信片俾自己。由几年前唔知点解突然开始有储明信片嘅习惯,自己去旅行会寄俾自己(有时怕寄失会买多一张extra拎返香港),朋友去旅行又会R佢明信片。

预科时代我嘅旅行瘾仲未好深嘅时候(无计,果阵视野比较窄),已经有个朋友成日去旅行,自己去美国睇Madonna 演唱会,男朋友做空少又成日痴一折机票四围去,已经储落好多张由佢亲笔写上款係「bitch!」嘅明信片。(係呀,係讲紧你呀八婆);有朋友去百慕达field trip(好羡慕⋯⋯),果张明信片应该係目前为止最难储到嘅一张,有素未谋面嘅笔友寄俾我嘅⋯⋯有好多好多,每次谂起都好开心,开心在有好多人肯花钱花时间千里鹅毛,寄一张咁有爱嘅明信片俾我呢个麻烦友。

几年落积下积下,不知不觉塞满了屋企两个盒(当然係人地寄俾我嘅佔大多数),上年暑假返香港无聊时坐喺梳化逐张逐张拎出嚟睇,好似环游咗世界一次,听落好似有d夸,但对我嚟讲每个旅程都係一个故事,无论好与坏,我都会将记忆化成文字写喺明信片,日后睇返绝对会回味无穷,然后又触发旅行瘾,即刻plan下一个旅程。

当然,叫得朋友寄明信片俾我,到我港女出巡嘅时候都未免要还债。债主积下一个又一个,而家电话有个叫’address’嘅album,入面全部都係我朋友地址嘅whatsapp cap图⋯⋯方便又快捷。唔洗惊到时要寄先无wifi问唔到人拎地址嘛。所以有时去到买明信片一口气就几十张加几十个邮票(睇情况啦,例如挪威一个邮票NOK 17一张明信片NOK 8我真係无能力寄晒俾每一个⋯⋯),夜晚返酒店食住宵夜趴喺床慢慢写。写果个写得兴起,都希望收果个收得开心。

后话:顺手多谢果班去旅行时俾我R明信片嘅朋友。 我都知我好烦,但我想讲收到你地寄俾我嘅明信片真係超开心,好似俾你带埋去旅行咁!

相关文章